Myen hpyen hpung ni Mungshawa marai langai hpe rim zing tawn

Mungmyit Sinli Ga ( Kachin Sub-State ) ginra, Kutkai Ginwang, Ning Lum Ninghtawn, Malun Salem mare na Slg. Lahtaw Tu asak ( 51 ning ) gaw lai wa sai shata August, 30 ya shani Malun Bum maga de Wan N-ga sa ju nga ai ten Myen hpyen dap Dapnu ( 88 ) kata na hpyen hpung ni hte KIA hpyen hpung ni gasat majan byin nna nhtang yu wa ai kaw Myen hpyen hpung ni lata rim hkrum mat ai lam na chye lu ai.

Myen hpyen hpung ni kawn Slg. Lahtaw Tu a sumla hte Malum Salem mare na mare uphkang salang ni hpe sumla madun nna Malum Salem mare masha re nre san ai hta mare salang kawn ndai mare na masha n re, n mu ga ai, n chye ai ngu tsun ndang kau ai. Dai shani kaw na September praw, 3 ya shani du hkra Slg. Lahtaw Tu hpe naw matut rim zing tawn ai lam chye lu ai.