Myen hpyen hpung ni Mungshawa ni hpe jahkrit shama gumhpraw hpyi ai hte arung arai ni la mat wa ya
KIA Dap Ba ( 3 ) Dap Dung ( 27 ) ginra hta April praw, 6 ya shani Mung Hkawng mare Lawk ( 4 ) kaw nga ai Slg. Labang La hte Jan Labya Ji Tawng yan a n ta kaw Myen hpyen hpung ni kawn gumhpraw Ks;-500,000 sa hpyi ai hte jahkrit shama mang hkang sa tam ai majaw Jan Labya Ji Tawng gaw gumhpraw Ks;-200,000 jaw kau dat ai lam na chye lu ai.
April praw, 6 ya shani hta mung Gashawt maga de malu masha wa sa ai Myen hpyen hpung ni kawn Wa Lu Pa mare na Mungshawa ni arung arai hte KBC Nawku jawng kaw na arung arai ni hpe htaw la mat wa ya ai lam chye lu ai.
La mat wa ai arung arai ni gaw Slg. Marip Naw a Mam Htu Jak ( 1 ), Cycle ( 2 ), Slg. Marip La a Mam Htu Jak ( 1 ), Slg. Hpauna La a Mam Htu Jak ( 1 ), Jan. Lasi Hkawn a Wa ( 2 ), Slg. Lasi La a Wa ( 1 ) hte KBC Nawku Jawng kaw na dung lahkum, hpun nba, di hkawan ni re lam chye lu ai.
KIA Dap Ba ( 2 ) Dap Dung ( 14 ) ginra hta mung Wara Zup mare, Yuzana Jak Rung shingdu mahkrai kadun maga kaw April praw, 6 ya jahpawt hkying 9:00am aten hta Nga sa hkwi na matu sa wa ai Yuzana Site kaw na ဦးသိန္းဆယ္(ရခုိင္) gaw Myen hpyen dap ni hkam tawn ai ngu maram lu ai Bom ( 1 ) kapaw la nna asak si sum mat ai lam na chye lu ai.
