Myen hpyen la ni ramma langai hpe adup zingri da
Namhpaka Sinpraw mare Hkumung gat makau kaw November shata 16 ya shana hkying 8:30pm aten hta, Nam Kawn Rung kaw nga ai Dapnu (88) kata na Myen hpyen la ni gaw Modo hte kalang ta yu wa nna, Shadang Hpauyam Doi Awng hpe adup zingri da nhtawm bai wa mat ai lam, buga masha ni shana wa ai kaw na chye lu ai.
Adup abyen hkrum ai Shadang Hpauyam Doi Awng asak (25) ning gaw Salang Hkamsa hte Jan. Hkawn Hpa yan a kasha rai nna, Nam Um mare kaw na re lam, Shadang Hpauyam Doi Awng gaw, Namhpaka Sinpraw mare de manang ni hte bungli galaw sa nna bai wa ai ten, lam kaw adup zingri hkrum ai lam, Namhpaka Sinpraw mare kaw na Shadang Ja Di tsun ai hta, “Ramma ni gaw hkauna pa Mam sa bum na wa ai kaw shanhte manang ni hte loi li wa garu hkat ai lam nga ai. Makau grup yin na masha ni phone matut dat sam ai, Nam kawn Rung kaw nga ai Myen Hpyen La ni gaw kalang ta Modo hte yu wa nna, nanhte masha shazai ni i?, Modo lam kaw gumhpraw hkap sha ai masha ni re ngu nna shadang Hpauyam Doi Awng hpe kalang ta shang abyen, hkin dit, sinat hte baw kaw abyen kau da nna wa mat ai” nga nna tsun dan ai.
Myen hpyen la ni gaw mungmare masha ni hpe mara kata shanhte hkrai ladat tam la nna ma ja hkan adup zingri ai lam gaw ramma ni hpe sha n-ga, Wunpawng amyusha ni hpe roi ai lam re, mare kata shimlum lam nnga wa ai majaw mungmare masha ni mung, mungmasa lam hte seng ai lam ni hpe grau grau chye na da ra na re nga nna, Shadang Ja Di matut tsun ai.
Shadang Hpauyam Doi Awng gaw ningma loi tsang ra ai raitim, ya aten tsi rung yu nna, dum nta kaw tsi tsi hkam la nga ai re.
Nam Kawn Rung kaw nga ai Dapnu (88) kata na Myen hpyen hpung ni gaw Modo lai wa lai sa masha ni hpe gumhpraw hta sha nna nga taw ai grai na sai, mare kata shana aten ntam Modo hte jahkring hkring lai hkawm nna, masha hpawng majaw ai mu yang, kalang ta dam kayat ai lam ni galaw ai re, Namhpaka Sinpraw mare kata lai wa sai aten hta gaw, masha adup zingri ai mabyin manghkang ni nnga yu ai re lam chye lu ai.
Photo Credit; Ja Di Hkangda
