Myen hpyen ni nga ai shara kaw Kokang MNDAA ni sa htim gap

Mungmyit Sin Ga (Kachin Sub-state) KIA Dap Ba 10, Dap Dung 17 ginra, Bang Ya Yung Bum kaw shara la nga ai Myen Hpyen Dap, Dapnu 99 kata na hpyen hpung ni hpe March shata 29 ya shani Kokang MNDAA hpyen hpung ni sa htim gap ai lam na chye lu ai.

Myen Dapnu (Tatma) 99 ni nga ai Bang Ya Yung Bum (Relay Kawng) kaw Kokang MNDAA ni, dap pram ladat hte sa htim gap dat ai kawn jahkring mi gap hkat ai, laja lana gaw nre ai lam, ginra shi sawk ni shana wa ai.

Ndai shara kaw March shata 26 ya shani hta mung, gasat gala majan byin ai re.

Ya aten hta Myen Hpyen Dap, Dapnu 99 kata na pawng hpawm hpyen n gun 600 daram gaw, Bang Ya Yung Bum, Namhkai, Na Leng hte Ja Yang hkan shara la nga ai lam chye lu ai.