Myen hpyen ni rim woi mat ai mugmasha ( 3 ) hpe bai dat ya
KIA Dap Dung ( 11 ) ginra, Kasung mare de, August 11 ya shani Ts.K.Hk ( 3 ) kata na Myen hpyen hpung ni mare de shang gap wa ai majaw, mungshawa nkau si hkala hkum nna, nkau hpe rim woi mat ai hta August 13 ya shani Nyawng Taw mare kaw bai dat ya sai lam, buga masha ni kawn chye lu ai.
Dat ya hkrum ai ni gaw, jawng saranum Woi Tsai hte salang marai ( 2 ) rai nna, ndai ni hpe hpyen yen komiti salang ni kawn Nyawng Taw mare kaw na sa woi la nhtawm, ya aten Namtim Lambraw Yang hpyen yen dabang kaw du nga sai lam chye lu ai.
Naw ngam nga ai mungshawa ni hpe nawku hpung woi sara ni hte PCG ni sa woi la nna, Namti Lambraw Yang kaw du nga sai lam chye lu ai.
Namti Lambraw Yang kaw du nga ai hpyen yen mungshawa yawng marai 1075, nta htinggaw 244 re lam, malu masha hte tsi mawan ni hpe gaw, mungshawa ni hte uhpung uhpawng nkau mi jaw ya ai lam, ya aten yak hkak nga ai gaw, rawng na dum nta yak hkak nga ai lam, lit ang ai sara langai tsun ai kawn chye lu ai.
