Myen hpyenla ni laiwa laisa mungmasha ni hpe laja lana sawk jep
Mungmyit Sinli Ga ( Kachin Sub-State ) KIA Dap Ba ( 6 ) Dap Dung ( 36 ) ginra, 105 mile hte Pang Sai, Munggu lam lapran kaw, November praw 6 ya shana hkying 6:00pm aten hta Myen hpyenla ni, laiwa laisa mungmasha ni hpe sawk jep nga ai lam, buga na salang langai shana wa ai.
Gara de sa na gara de na wa ai hpabaw bungli ni galaw ai nga san ai, Mungchying masat ( မွတ္ပွံတင္ ) ni san ai, bai nna hkum hkan du hkra sawk jep ma ai nga nna, salang wa tsun ai.
November praw 4 ya shani hta mung, KIA Dap Ba ( 2 ) Dap Dung ( 6 ) ginra, Hpakant Myen hpyenla hte Balik ni, Seng Tawng kawn Gwihka sa wa lam lup wa kawng kaw laiwa laisa mungmasha ni hpe sawk jep ai lam, buga masha ni kawn chye lu ai.
November praw 4 ya hta sha, jahpawt hkying 7:00am aten daram hta KIA Dap Ba ( 2 ) ginra, Hkawng Law maga kawn shamu shamawt lung wa ai Myen hpyen dap, Hk.L.Y ( 237, 238 ) na pawnghpawm hpyen n-gun ( 50 ) daram hte KIA Dap Ba ( 2 ) hpyen hpung ni, Jam Bu makau kaw gasat majan byin ai lam, shawnglam shisawk ni kawn chye lu ai.
