Myen Kaichyan, Tsa Ya Hpa ( Ts. Y. Hp ) ni, mare uphkang salang hte mare kata na sak kung salang ni hpe san jep
Mungmyit Sinli Ga ( Kachin Sub-State ) KIA Dap Ba ( 10 ) Dap Dung ( 17 ) ginra, Gangming Loidau Ginwang, Manau Bum Ninghtawn, Na Ti mare kaw Sinli Kaichyan, Ts.Y.Hp hte Kuthkai Ts.Y.Hp ni October praw 4 ya shani, Na Ti mare uphkang salang hte mare kata na sak kung salang marai 7 hpe shaga la nna, san jep ai lam shiga na chye lu ai.
Myen Ts.Y.Hp ni san jep ai gaw, Na Ti mare grup yin hta KIA ni ahkun hta shamu shamawt ai lam, mare masha ni a ntsa gara hku tsun shaga kanawn mazum nga ai lam hte, TNLA, MNDAA hpyen hpung ni gara hku shamu shamawt nga ai lam ni hpe madung san jep ai re lam, ginra shisawk ni kawn chye lu ai.
Lai wa sai September 23 ya shani hta mung, KIA Dap Dung ( 17 ) ginra rai nga ai, Na Leng mare masha ni hpe Myen Hpyen Dapnu ( 99 ) kata na hpyen hpung ni kawn nanhte mare masha ni KIA ni hpe madi shadaw makoi ya ai majaw, ndai ginra hta manghkang byin ai ngu mara shagun tsun ai hte ntsen nhten ai dum nta hkan sawk jep hkawm ai lam galaw lai wa sai re.
