Myitkyina hte Chihpwi Jau Ginwang lahkawng na ramma ni Fellowship galaw na

Myikyina hte Chihpwi Jau Ginwang lahkawng na ramma ni a Fellowship lamang mahkyen hpe April shata 12 ya shani kaw nna 19 ya shani du hkra nhtoi 8 ya tup Chihpwi Jau Ginwang nawku jawng wang kaw galaw sa wa na re lam chye lu ai.

“Jau Ginwang lahkawng na ramma ni pawng hpawm na galaw ai a yaw shada lam gaw, Myitkyina hte Chihpwi ramma ni grau na hku hku hkau hkau mahkri shawn sa wa lu na matu, tinang ndu ga ai shara ni hpe mu la chye la lu na matu hte shara nnan ni hta myitlawm hkumlawm sharin la lu na matu rai nna, Activity Discussion hku nna mung ganawn mazum hpawng ngut ai hpang Chihpwi myo a shingra tara ni hpe yu hkawm chyai lu na matu hkyen da ga ai” nga nna Myitkyina Jau Ginwang Ramma Hpa Awn Sara Udi Aung Lat tsun ai.

Sharin sa mat wa na ginlam ni gaw Makam Masham lam,Htunghking hte kaga chye chyang ra ai hpaji magup sumhpa ni hpe sharin ya na rai nhtawm Chihpwi myo hpe jasan jaseng ai lam,Chihpwi myo grup yin ni hkan e ningmu jahpaw woi galaw ai lam ni hpe mung galaw sa wa na re lam chye lu ai.

Myitkyina Jau Ginwang Ramma Hpu-Awn Sara Udi Aung Lat matut tsun ai hta “ Ramma ni mung, du wa na ningmu jahpaw ganawn mazum hpawng hta yawng hpe sa du shang lawm na matu saw lajin dat ai.Dai majaw ramma ni yawng n gun mi alu rai, shang lawm na matu saw shaga dat nngai.

Ndai ganawn mazum hpawng hta sa du shang lawn sa wa na ramma ni gaw March shata 31 ya shani hpang jahtum mying bang ra na rai nhtawm hkawmsa hkawmwa, palawng hte mying bang manu yawng mun masum ( 30000 ) masat da ai re lam chye lu ai.

Ndai ganawn mazum hpawng hpe Myitkyina Ginwang Up Jau Dr. Peter Hka Aung Tu hte Chihpwi Ginwang Up Jau Brang Aung yan kaw nna lam matsun madun, n gun jaw ai hte galaw sa wa na re lam na chye lu ai.