Myitkyina ginra kaw lai wa lai sa mungshawa ni hpe Myen hpyen la ni kawn hkap jahkring nna adup abyen jahkrit shama ai lam galaw
Myitkyina Dumgan hte Alam mare lapran na Tang Shang Hka mahkrai kadawng hte Dumgan lai Mungmyit Hka mahkrai kaw shinggan hkying bu hpun ai Myen hpyen la ni kawn lai wa lai sa mungshawa ni hpe hkap jahkring, hput di di shangun nna sinat hte adup abyen gumhpraw hpyi shagyeng jahkrit shama galaw ai re lam, ginra masha ni shana wa ai kaw na chye lu ai.
“May shata 11 ya shana daw hkying 3:00pm aten kaw nna hkying 7:30pm aten du hkra re, tsa ma grai nang ai, shanhte gaw shinggan hkying bu hpun palawng hte sinat hpye ai, shanhte masha n-gun gaw dap chyen (3) ram nga ai raitim, ngam ai ni gaw makoi taw nna she marai 5 ram sha pru ai” nga nna dai ginra na salang langai tsun ai.
Hpung magam gun ni hpe mung du manat, dung rawt galaw shangun ai sha n-ga, mungshawa nkau a Mawdaw pat ni hpe mung adup abyen ga kau ya ai lam, salang wa matut tsun ai.
May shata 11 ya shani hkying 1:30pm aten daram hta mung, Myen hpyen la ni kaw nna Awng Min Ta pyaw chyai grinra kaw Wunpawng amyusha num sha (1) hte la kasha (1) hpe mying hte hkrak wa rim la ai lam chye lu ai.
Ya aten Myitkyina ginra kata Myen Balik ni hte Myen hpyen la ni gaw hkawm sa hkawm wa mungshawa ni hpe rim mayu ai ni hpe rim, sat mayu ai ni hpe sat rai nna, jahkrit shama ai lam galaw nga ai majaw mungshawa yawng hkrit tsang nga ai ma ai lam na chye lu ai.
