Myitkyina ginra Myen hpyen dap ni yup tung jahpan hkan hta san jep ai lam galaw nga

Myitkyina ginra hta gumshem Myen hpyen dap ni March shata praw kaw nna, yup tung jahpan hkan hta san jep ai lam galaw nga ai sha n-ga, masha rim lahkawn ai lam ni galaw nga ai hpe chye lu ai.

Gumshem Myen hpyen dap ni gaw, nta shagu na yup tung jahpan hkan hta ai nre ai sha, lam kaba makau hkan na nta hte lam makau hkan na gat seng shara ni hta, hkan hta san jep ai lam galaw nga ai rai nna, nta masha marai kade nga ai, nta kaw nnga ai masha hpe gara de sa ai, hpa baw bungli galaw ai, asak gade re ngu ai lam ni hpe jahkrit shama san jep nga ai lam, ginra masha ni tsun ai.

Laiwa sai March shata praw 8 ya shani hta mung, Pang Wa maga na yu wa ai mungshawa marai 9 hpe gumshem Myen hpyen dap ni ဗလမင္းထင္ mahkrai kaw rim woi mat ai lam ni nga ai rai nna, asak naw ram ai ramma ni hpe gaw, hpyen rim lahkawn ai lam ni galaw nga ai hpe chye lu ai.

Myitkyina ginra hta gumshem Myen hpye dap ni hpyen shamu shamawt ai lam ding yang ngu na galaw nga ai majaw, mungshawa ni sadi maja let hkawmsa nga ra ai sha n-ga, phone internet line ni pat tawn da ai majaw, lam amyu myu hta yakhkak nga ai lam chye lu ai.