Myitkyina Ginwang a (50) lang na hpung shawa zuphpawng galaw sa wa na

Myitkyina Ginwang Jinghpaw Wunpawng Hkalup Hpung Ginjaw a (50) lang na hpung shawa zuphpawng hpe March shata 23 ya shani kaw nna, galaw sa wa na re lam chye lu ai.

Zuphpawng hpe March shata 23 kaw nna, 26 ya shani du hkra galaw sa wa na rai nna, ya aten zuphpawng a matu hkyen lajang nga ai lam, Hpt. Mading Ying Ting (Gawgap Komiti) tsun ai kaw na chye lu ai.

“Ya ndai hpung shawa zuphpawng a matu, hkyen lajang ai lam gaw lai mat wa sai February shata 26 ya shani kaw nna, gaw gap komiti 7 hpaw ninghtan let, hkyen lajang taw nga sai re, hkyen lajang wa ai shaloi grai jau mat ai majaw, kawa ni hpa ni la ra ai yakhkak ai lam ni grai nga mat ai raitim mung, hpung shawa gaw grai ahkyak ai re majaw, ndai lam hpe byin tai hkra anhte grai jawm shakut taw nga ai lam rai sai” nga nna tsun ai.

Gaw gap hkyen lajang ai lam hta hpung shawa ni yup na nta sum pe 18 dam ai, pe 60 galu ai yup sum 10, dap komiti rung, shim lam ni yup na shara, daw jau ni yup na shara, zuphpawng gawknu ni, nsen htawn shara zawn re sum ni law law hpe galaw nga ai lam Hpungtau wa matut tsun ai.

Ndai zuphpawng hta 4 ning galaw lai wa sai magam bungli ni hpung shawa ni hpe hti dan ai lam, matut nna 4 ning magam bai gun sa wa na ginwang a magam gun ningnan ni hpe lata san ai lam, hpung up sara aya tang na lam ni hpe galaw sa wa na re lam chye lu ai.