Myitkyina, Hotel Hukaung kaw manam n hkapla shi
Myitkyina, Dap Kawng kaw na Hotel Hukaung kaw lockdown dawm ai nhtoi 14 ya nhpring shi laman, Hotel manam garai n hkapla shi na lam chye lu ai.
Hotel Hukaung hpe September shata praw 6 ya shani kaw nna lockdown jahkrat nhtawm, Hotel madu hte rau hotel bungli galaw masha ni, dai Hotel kaw wa yup hkringsa ai manam ni hpe nhtoi 14 ya Quarantine tawn nna tsi jep ai hta, negative mahtai pru ai majaw, September shata 14 ya shana maga hkying 3:00pm aten hta lockdown dawm kau sai raitim, dai Hotel hta manam n hkap la shi ai lam, Myitkyina Dap Kawng Mare Uphkang Salang Maran Bawk Naw tsun ai.
“Shanhte Hotel bungli galaw masha gaw 15, quarantine bang da ai gaw 6, 21 re. Ana jep ai hta negetive mahtai pru ai majaw lockdown dawm kau ai lam rai nga, ya aten laman gaw manam nmai hkapla shi ai da Muklum uphkang salang tsun ai, nhtoi 14 ya yawm htum hpring ra ai, Quarantine masha ni hpe gaw ana jep ngut sai majaw bai wa shangun sai re” nga nna tsun ai.
COVID-19 ana masat 1155 gaw Nay Pyi Taw kaw na Myitkyina de bungli hte sa ai ten, August shata 28-29 ya, 2 na tup Myitkyina, Hotel Hukaung kaw manam ngut nna, Nay Pyi Taw de shang wa ai kaw COVID-19 ana kanu jep mu lu ai lam chye lu ai.
Ya aten Myen Mungdan kata hta COVID-19 ana kap ai masha 3299 jan nga sai rai nna, ana ntsen nhten ai masha marai 9165, ana hkyemsa wa ai masha marai 790 hte asak si sum mat ai masha marai 32 du sai lam, Hkamja Lam hte Ginsup Hkringmang Dap kawn ndau da ai re hpe chye lu ai.
Photo Credit; Hotel Hukaung
