Myitkyina htawng na lawt pru wa ai KBC Sara yan hpe hkaptau hkalum ai akyu hpyi hpawng galaw

Myitkyina htawng kaw na bai lawt pru wa ai Rev. Bima Dau Lum hte Sara Sumlut Tu Htang yan hpe hkaptau hkalum ai akyu hpyi hpawng hpe February shata 21 ya shani Myitkyina Ginwang Hkalup Hpung Ginjaw Rung kaw galaw ai lam chye lu ai.

Chyeju shakawn akyu hpyi hpawng hta Shiga Dap ni kaw nna Sara yan hpe san la mayu ai lam ni hpe san ai lam galaw ai, WMR kaw nna mung magun lit hte sa du ai re lam, hpawng hte seng nna tsun ahkang lu ai Rev. Dr. Maji La Wawm tsun ai.

Sara yan gaw lai wa sai February shata praw 5 ya shani Jaw Bum kaw galaw ai (60) lang na rawt malan ninghtoi wunli sharawt akyu hpyi hpawng hpe woi awn ai yan re nga nna, Myitkyina Balik Dap kawn February shata praw 6 ya shani rim zing da ai rai nna, February shata 11 ya shani Myitkyina hkyuk htawng de shara bai htawt sit kau ai hpang, February shata 20 ya shani hta bai shalawt ya ai re hpe chye lu ai