Myitkyina hte Waimaw kaw nga ai hpyen yen mungshawa ni hpe Shingni Nbat ni malu masha garum
Myitkyina hte Waimaw Muklum kata kaw nga ai hpyen yen mungshawa ni hpe March shata kaw nna, Shingni Nbat kawn malu masha hte arung arai ni hpe garum jaw nga ai lam chye lu ai.
Garum jaw ai malu masha hte arung arai ni gaw, sha Sau, Gala shapre, Yang-yi, U di, ba hkri si hte hkum kahtet shadawn jak, n-gup magap (Mask), Ta mawza ni re.
Garum jaw ai hte seng nna, Shingni Nbat a ningbaw rai nga ai Jan. Lahpai Nang Pri kaw nna ya na zawn tsun ai.
“Anhte ya gaw Myitkyina hte Waimaw Muklum kata kaw nga ai ni hpe sha garum taw ai. Shawoi gaw ndai Muklum kata hkan, Nawku Hpung ni dangdi ai daram yu ai ngu nna, anhte gaw sumtsan de sa garum ai. Ya ndai kalang gaw ana zinli a majaw hkawmsa hkawmwa yakhkak ai sha n ga Muklum kata nan yakhkak ai lam grai nga ai majaw garum ai”nga nna tsun ai.
April shata 11 ya shani kaw nna gaw, camp kata nga ai gumhpraw kadai nlu tam sai gaidawng gaida nta htinggaw ni hpe N-gu mung dangdi ai daram garum na matu hkyen da ai lam chye lu ai.
Shingni Nbat hpe lai wa sai 2013 ning, March shata praw 1 ya shani hpaw hpang wa ai rai nna, Maigan kaw nga ai amyusha ni hte tinang Mungdan kaw nga ai amyusha ni hku nna, hpyen yen ni hpe lam amyu myu hku garum dat ai hpe hpyen yen ni a lata kaw du hkra shalai jaw, mahkrai tai ya ai sha n ga, hpyen yen ngut mat ai raitim, myusha ni a matu galu kaba rawt jat lam hta matut nna garum jaw na pandung tawn da ai re lam chye lu ai.
