Myitkyina Kahtawlik Nawku Hpung ni lam hkawm akyu hpyi n-gun madun lamang galaw

Myitkyina Muklum, Kahtawlik Nawku Hpung ni kawn Rosary hti ai hte Lam hkawm n-gun madun akyu hpyi lamang hpe Myitkyina Sasana Sagu rem wa, Wa Saradaw Francis Daw Tang ni woi awn nna May, 28 ya jahpawt hkying 7:30am aten hta San Columban Cathedral kaw hkrum zup nna galaw sa wa na re lam chye lu ai.

Jinhpaw Mung hte Myanmar Mung ngwi pyaw simsa wa lu na matu yaw shada let Rosary hti na, Mahkawn shakawn ai hte Lam hkawm akyu hpyi n-gun madun lamang hpe htinggaw shagu nta sin masha hta lai nna sa du shang lawm na hte wuhpung shagu Maria ဆင္းတု ni hpe la sa rai nna Myitkyina Muklum kata ding yang lam hkawm mat nna San Columban Cathedral kaw bai wa zup na re lam chye lu ai.

Ya na zawn Rosary hti, akyu hpyi Lam hkawm n-gun madun lamang hpe No.1 lang ngu na galaw ai re lam hte lamang hta hpung masha yawng marai ( 5000 ) jan ram sa du shang lawm ai re lam chye lu ai.