Myitkyina, Mandalay hkrunlam ntsa Myen hpyen dap ni laja lana sawk jep nga
Oplus_131072
Myitkyina, Mandalay hkrunlam ntsa na shagyit ni hta gumshem Myen hpyen dap ni hkawmsa hkawmwa hte kun rai htaw shalai la ai lam hta laja lana sawk jep nga ai lam chye lu ai.
Gumshem Myen hpyen dap ni gaw hkrunlam hkawm mungshwa ni hte kun rai htaw shalai la ai lam hpe laja lana sawk jep nga ai rai nna, kun rai nkau hpe aten galu rim zing kau ya ai hta kun rai nkau htenza mat ai lam ni byin hkrum nga ai majaw yakhkak hkrum nga ai lam, mungshawa ni kaw na chye lu ai.
Kun rai ni hpe rim zeng kau ya ai lam ni a majaw, dai kun rai dut hpaga galaw nga ai ginra nkau de kun rai ni nshang mat nna, mi nga taw ai kun rai ni mung shawoi na hta grau manu rawt tsaw mat ai lam ni byin nga ai hpe chye lu ai.
Ya na zawn gumshem Myen hpyen dap ni laiwa sai aten hta mung galaw nga ai raitim, ndai laman laja lana grau sawk jep ai lam galaw nga ai majaw, hkrunlam hkawm mungshawa ni hte gap dut hpaga galaw nga ai mungshawa ni mi na hta grau yakhkak hkrum nga ai lam chye lu ai.
