Myitkyina Muklum hta shadang Gum Seng Awng a myitdum akyu hpyi hpawng hte shi sanglang hpawng galaw
Myitkyina Muklum Maisak Wang hta April 26 ya jahpawt hkying 8:00am aten kawn hkying 12:00pm aten laman shadang Gum Seng Awng a shata 10 hpring myit dum akyu hpyi
hpawng hte amu manghkang hte seng ai shi sanglang hpawng galaw ai lam chye lu ai.
Akyu hpyi hpawng ngut ai hpang shi sanglang hpawng hpe matut galaw mat wa ai. Ndai shi sanglang hpawng galaw ai lam gaw, tengman ai mabyin ni hpe chye lu na matu hte matut galaw sa wa na lam ni hpe tsun jahpra dan mat ai.
Tara kasa salang Hkun Nawng tsun ai hta “Nnan byin ai shaloi kaw na mabyin hte ndai mabyin hpe mu ai ni a ningmu hte masa hpe e, shingdaw yu ai shaloi gaw, grai shai taw ai hpe mu ai. Myen shiga dap ni shapoi ai hkan gaw hpyenla marai 8 a sinat wa kashun ai majaw re nga tsun ai. raitim, kaja nga jang gaw Myen hpyenla lahkawng mahtang shi kaw sa nna, adup ai hte htawng ai hte di nna, sinat hte gap sat ai she re. shadang Gum Seng Awng a manang ni hpe mung tara hkam masha ( တရားခံ ) ni ngu nna, Myen hpyen dap kawn tara nhtang jewat ai lam hpe ( တရားလို ) maga de bai shaprai da lu sai” nga nna sanglang dan ai hpe chye lu ai.
Ndai amu hpe Wunpawng Amyu Sha Zinlum Hpung kaw na woi awn nhtawm, ( အမႈမွန္ေပၚေပါက္ေရး ) komiti ngu hpaw shabawn let tengman ai mahtai lu hkra sawk sagawn nga ai lam na chye lu ai.
Shadang Gum Seng Awng asak 19 ning gaw Computer dakkasu jawngma langai rai nna, lai mat sai 2016 June 20 ya shana Myen hpyenla Maung Maung gap sat kau ai re hpe chye lu ai.
