Myitkyina Muklum hte shara nkau hta hka lim tsin yam hkrum nga

Myitkyina Muklum shara nkau hta Mali Hka tung kaba wa ai majaw, July shata praw 1 ya jahpawt kaw nna, Muklum kata de hka lim wa nga ai lam, ginra masha ni kaw na chye lu ai.

Hka lim tsin yam hkrum ai shara ni gaw, Manhkring, Tsetmu Zung, Yangyi Awng, Shatapru, Alekung, Kachin Tsu, Rambo lawk hte Waimaw hkran Aungmye Nit hpyen yen dabang ni rai nga ai.

Hka gaw yawm wa ai lam nnga ai sha, hkying hkum mi laman hta letma 3 daram hka rawt lung wa ai lam nga ai. Muklum kata na hkye mawai hpung ni mung nhkring nsa shakut shaja nga ai hta jak li nlaw ai majaw yak hkak nga ai lam chye lu ai.

Myitkyina Muklum kata de, lai wa sai 2004 ning July shata 19 ya shani hta mung, Mali Hka kaba wa nna, mare lawk kata hka lim ai lam ni byin lai wa sai rai nna, shaning 20 ning na ai hpang ya na zawn hka kaba wa ai re lam, ginra masha ni tsun ai.

Hpakant Uru Hka kaba wa ai majaw, Lawng Hkang mare hte Mashi kahtawng ni hta mung, hka lim wa ai sha n-ga, Danai Hka kaba wa nna, Awng Lawt mare daw mi hka lim mat ai majaw, mungshawa ni hka hpyen tsin yam hkrum hkra yak hkak nga ai lam chye lu ai.