Myitkyina Muklum kata laiwa laisa mungshawa ni a phone sawk jep nga

Myitkyina Muklum, Bala Min Htin mahkrai, Pa La Na Myen Balik Dap shawng hte Myitkyina Masat (5) jawng mahkrai ni hta, laiwa laisa mungshawa ni a phone hpe Myen Hpyen Dap hte Balik Dap ni kaw nna jahpawt, shana shani shagu ngu na daram sawk jep nga ai lam, ginra masha ni shana wa ai kaw na chye lu ai.

Phone sawk jep ai lam hpe March shata praw kaw nna jep chyoi hpang nga sai rai nna, aten ntam shiga lak lai ai masa hta hkan nna jep chyoi nga ai lam, phone kata sawk jep nhtawm, Myen Hpyen Dap kaw nna shanhte nra sharawng ai mu hkrup yang shata (3), shata (6) hkyuk bang ai lam, phone sawk jep ai hta rim hkrum ai mungshawa ni nga ai re lam, Myitkyina ginra na salang langai tsun ai.

Ya na zawn aten ntam phone hpe sawk jep ai lam galaw nga ai re majaw, mungshawa yawng mung tinang a phone hpe shim ai hku security galaw da yang kaja ai hte phone 2 san tawn nna, shinggan de pru hkawm sa ai shaloi, sadi sahka hte hkawm sa yang kaja ai lam, salang wa matut tsun ai.

Myitkyina Muklum kata Gumshem ai Myen Hpyen Dap hpe nra sharawng ninghkap n-gun madun lamang galaw ai hta, Myen Hpyen Dap hte Balik Dap kawn sa du je bat masha shabra ai lam galaw ai sha n-ga, sinat hte gap sat ai lam, rim zingri zingrat ai lam galaw ai majaw, ya aten laman mungshawa law law hte n-gun madun ai lamang ni nau n galaw sai raitim, ramma ni kaw nna ladat amyu myu shaw let ninghkap n-gun madun lamang ni woi awn galaw nga ai re lam na chye lu ai.

Photo Credit; fb