Myusha masa ningmu shatsaw hte media ningmu jahpaw sharin hpawng galaw
Uru Seng Maw Ginwang Chyurum Wunpawng Htunghking Hpung kaw nna woi awn nhtawm, myusha masa ningmu shatsaw hte media ningmu jahpaw sharin hpawng lamang hpe May shata 13 ya shani kaw nna 14, 15 masum ya tup Hpakan Mawwan lawk Htunghking Manau Wang kaw galaw nga ai lam chye lu ai.
Sharin sara gaw Sara Zinghang Gam Htun ( KBC Singapore ) hte Wa Jau Galang La Raw yan kaw nna wa du sharin ya nga ai re.
“Yaw shada ai lam gaw daini na anhte Wunpawng Myusha ni hte seng ang ai sutmasa, mungmasa bai nna hpaji masa, lamshagu lahkam tsaw wa na matu, mungkan madang dep ai hku chyemyit chyesawn ningmu lu na matu, nkau mi gaw ningmu hpaw chyalu nga ai ni mung, ningmu grau tsaw wa nna, shawoi na zawn sharin hpawng kaw sharin ngut kau sai hku nre sha, ndai sharin hpawng ngut ai hte tatut bai jai lang wa lu na matu rai nga ai” nga nna sharin hpawng lit hkam Sara Sumlut Naw Htoi tsun ai.
Ndai lang gaw ya tatut woi awn taw ai ni shawng masa hpe chye hprang ngut ai hpang nambat 2 lang ngu na hta gaw, Uru Seng Maw ting na shawa yawng bai wa lu sharin hka ja lu na matu masing jahkrat da ai lam, Sara Sumlut Naw Htoi matut tsun ai.
Sharin hpawng hta Hpakan Ginwang Htunghking Hpung kata, gaiwang 9 ngu na masat da ai kaw na tatut magam bungli hpe woi awn nga ai Salang ni hte dakkasu jawngma ni yawng marai 100 daram sharin hkamla nga ai re hte lai wa sai 2018 ning October shata hta gaw manau naushawng hte seng ai lam, Wunpawng madum nsen hte seng ai sharin hpawng ni galaw ga sai lam chye lu ai.
