N-ga Ga hte Nambyu mare hkan na hpri daw hpri hkyep ni hpe Nawng Lung Kawng Ra mare na Myen mungmasha ni htaw lahka la nga

KIA Dap Ba ( 2 ) Dap Dung ( 14 ) ginra, Hugawng Ginwang, Nawng Lung Kawng Ra mare kaw nga ai Myen amyu masha ni gaw, November 4 ya shani hta N-ga Ga mare hte Nambyu mare hkan na hpri daw hpri hkyep ni hpe cycle, Tung Fung modo ni hte htaw la nga ai lam, ginra shi sawk ni kawn chye lu ai.

Nawng Lung Kawng Ra mare kaw htaw tawn ai hpri daw hpri hkyep ni hpe November 5 ya shani hta leng 10 kap ai modo kaba hte Myitkyitna maga htaw yu mat wa ai lam chye lu ai.

N-ga Ga mare hte Nambyu maga de, Myen hpyen dap hte matut mahkai nga ai ni sha nrai yang, ngam ai masha kadai mung nmai sa ai re lam, Ting Kawk mare na Salang langai tsun dan ai kawn chye lu ai.

KIA Dap Ba ( 2 ) Dap Dung ( 14 ) ginra de, 2017 ning shata man 6 kaw nna Myen hpyen dap ni gaw hpyen n-gun, laknak n-gun, majan gasat nbungli ni hte KIA hpyen hpung ni hpe laja lana wa htim gasat lung wa ai majaw, Dung ( 14 ) ginra, mare kahtawng nkau hkan na mungshawa law law gaw, Danai hte Myitkyina maga hpyen koi yen nga ai re. Ya aten dai ginra ni hta Myen hpyen dap ni shara la nga ai lam chye lu ai.