Na Lung mare hta jawng bai hpaw sa wa na
KIO Ginjaw Ginra makau, Na Lung mare hta dai ning na hpaji ladaw kaw nna, laika sharin jawng bai hpaw sa wa na re lam chye lu ai.
Gasat gala majan a majaw pat kau da ai, Na Lung mare na laika sharin hpaji jawng hpe 2024-2025 ning hpaji ladaw kaw nna bai hpaw sa wa na re lam, Nam San Yang Ginwang Daw, Hpaji Du Sara Kaba Lahtaw Zau San tsun ai.
“Anhte Na Lung mare gaw Ginjaw Ginra hte ma ni dik htum re, jahkring chyahkra gawan katsang, hkawmsa hkawmwa ni nawn ai re majaw, grau na Na Lung jawng hpe madung lu hpaw hkra ngu yaw shada ai, kashu kasha ni a hpaji lam mung hpang hkrat nmai ai, ni nawn ai kahtawng shagu na jawngma ni mung mai byin yang gaw, Na Lung jawng gaw lahta tsang jawng re majaw, yawng lu lung yang grau hkrak ai” nga nna Sara Kaba matut tsun ai.
Na Lung jawng gaw laiwa sai aten ni hta lahta tsang du hkra hpaw sharin wa ai raitim, dai ning gaw masa lam amyu myu a majaw lapran tsang du hkra sha naw hpaw sa wa na re lam chye lu ai.
Ya aten Na Lung jawng hta jawng mying bang da sai jawngma yawng marai 70 jan sai rai nna, sharin sara/num ni marai 10 jan rai sai re lam matut chye lu ai.
