Nam Gawn Myen hpyen dap hpe KIA ni gasat zing la
KIA Masat (2) Dap Ba, Masat (14) Dap Dung ginra Hugawng Ginwang, Nam Gawn gumshem Myen hpyen dap hpe KIA ni gasat zing madu la lu sai lam chye lu ai.
Nam Gawn mare dingsa (ja maw) gumshem Myen hpyen dap hpe KIA pawng hpawm hpyen hpung ni March shata 18 ya jahpawt hkying 5:30am aten daram kaw na htim gasat ai hta shana hkying 8:00pm aten daram hta gasat zing madu la lu sai lam, shawng lam na lit nga ai salang langai tsun ai.
Gasat gala majan byin nga ai aten gumshem Myen hpyen dap nbungli bawm, laknak kaba ni hte gap garum ya ai lam ni nga ai raitim, KIA pawng hpawm hpyen hpung ni zep zi padang dip la lu sai lam chye lu ai.
Nam Gawn mare dingsa (ja maw) gaw, Danai kaw na Payin Maw sa lam, Mai Hkun mare makau hta rai nna, lai wa sai 2017 ning hta KIA ni tat sum kau da ai shara re hpe matut chye lu ai.
