Nam Hpyek mare makau kaw Myen Hpyen Dap ni Dap nnan jung hkyen ai majaw, mungmare masha ni rem lu rem sha yak hkak wa mai
Danai Lido lam Nam Hpyek mare makau kanoi sun, nbungli pa mayan hta lamu ga Eka 1000 hpe Myen Hpyen Dap, Hk.L.Y 74 dap ni gaw Hpyen Dap nnan jung, shara jahkrat la mat wa na re majaw, Nam Hpyek mare hte Ting Kawk mare na mungshawa ni galaw lu, galaw sha, hkawm sa/wa, dusat yam nga rem sha yak hkak wa mai ai lam, buga masha ni tsun ai kawn chye lu ai.
“Yuzana hte Nam Hpyek mare lapran kaw rai nga ai, Ting Kawk mare hte Nam Hpyek mare na dusat yam nga ni gaw dai mayan de hkrai dat ai re majaw yak hkak ai lam ni nga wa mai ai, Dap jung yang gaw n hkrak ai” nga nna Ting Kawk mare na mungshawa langai tsun dan ai.
Maning hkan gaw ndai shara hta ginra jasan hpyen hpung ni du wa jang, chyahkring jahkra shimlam la ya ai ni gan nga ai re, nga nna mungshawa wa matut tsun ai.
Ya aten hta Myen Hpyen Dap ni gaw, Sumbwi Yang maga de mung, Hpyen Dap nnan jung na matu, lawu Myen Mung de na hpyen modo ni hta laknak machyu pala hte malu masha htaw nna shani shagu ngu na lung nga ai, January shata praw 5 ya shani hta gaw hpyen modo 36 tup lung wa ai lam, ginra shi sawk ni kawn chey lu ai.
