Nam Htawng hka kaba wa nna ginra masha ni hkawm sa hkawm wa yak hkak hkrum nga

Putao, Nbung Li Pa mare de na lwi hkrat wa ai Nam Htawng hka (Bum Hka) gaw marang htu sawng jang hka kaba wa ai majaw, Lung Tsut mare, Lemi Wachi mare hte makau grupyin mare kaw na ginra masha ni hkawm sa hkawm wa yak hkrak hkrum nga ai lam na chye lu ai.

Mahkrai hpe lit la galaw nga ai company kaw nna lanam ta du wa sai raitim, mahkrai lawan galaw shangut ya ai lam nnga ai re, marang htu sawng jang hka kaba wa nna, ginra masha ni hkawm sa hkawm wa yak hkak hkrum ai majaw, lai mai na hpun pyen mahkrai sha pi galaw ya na matu company ni hpe hpyi shawn da ai lam nga ai re nga nna Lung Tsut mare uphkang Salang, U Yinhtang Hpung tsun dan ai.

“Maning shawng shaning gaw mare masha ni hte mare uphkang salang ni kaw nna hpun pyen mahkrai htan da ai hpe company ni kaw nna ya gaw mahkrai lu sai, concrete mahkrai htan na re majaw, January shata kaw dai mahkrai dawm kau nhtawm, ya gaw mahkrai lawan galaw shangut ya ai lam mung nnga ai, hka kaba nna mung mare masha ni gaw gat sa nmai ai majaw, company salang ni hpe hka kaba nna mahkrai galaw ai lam hpe gan jahkring da ai raitim, hpun pyen mahkrai lai mai hku lawan galaw ya mi ngu sa tsun da ai re”  nga nna tsun ai.

Jawng hpaw na aten mung du wa sai hte maren, Leme Wachi maga kaw na Putao Lahta Tsang jawng de jawng sa lung ai jawngma ni gaw hka dai hpe rap nna sa ra ai re, marang htu sawng nna hka kaba ai rai yang jawng nlu sa na masa nga ai hte mahkrai hpe shangut ya shangun mayu ai nga nna Sara Awng Hkam tsun ai.

“Grai rai na kaba na ga ni gyi wa ai lam gaw nnga ai raitim, ya galaw taw ai lam hpe mai byin ai daram lawan shangut nna hkrun lam hkawm masha ni hte jawngma ni a matu masan sa hkra lawan galaw ya shangun mayu ai” nga nna tsun ai.

Ndai lam gaw jawng hpaw wa ai aten hta ginra masha ni mun lam hkawm sa hkawm wa lai ai lam kaba re majaw, asuya uphkang Salang ni kaw nna ndai mahkrai hpe lawan galaw shangut ya na matu ginra masha ni ra sharawng nga ai lam chye lu ai.

Putao ginra hta gaw ya na zawn mahkrai ni galaw ra ai shara ni grai law hkra nga ai rai nna, laiwa sai shata laman hta mung Man Nu hte Machang Baw Putao hpe matut mahkai da ai mahkrai hpe galaw ya na matu, Asuya hpang de mung shawa masha ni hku nna lang hte lang tang shawn ai lam nga ai raitim, Asuya kaw nna lit nla ya ai majaw ginra masha ni dang di dang dep ai hku galaw la lu ai lam nga ai re hpe chye lu ai.