Nam Mye hka mahkrai hpaw hpawng galaw
Nmau Ginwang Ginjaw, Shwigu Ginwang, Ja Chyai Ninghtawn, Kawng Ja mare na, Nam Mye hka mahkrai hpaw hpawng hpe June shata 27 ya jahpawt hkying 8:00am aten hta galaw la lu sai lam chye lu ai.
Hpawng hta Nmau Ginwang Ginjaw Komiti Amu Madu, Salang Kaba Lahpai La Doi, Masat (11) Dap Ba B.S.O Du Kaba Labang John Awng, Namlim Pa Jau Ginwang Up Wa Jau Peter Maran San Tawng, Mungding Pa Buga Hkalup Hpung Up Rev. Lashi Labya Hka Raw ni kawn, pan grang rep nhtawm mahkrai hpaw hpawng hpe galaw la lu sai lam, ginra masha ni tsun ai.
Mahkrai gaw gap ai lam gaw, laiwa sai aten mahkrai kaba nnga ai majaw, mungshawa ni hka lam hku na sha hkawmsa hkawmwa galaw nga ai hta yinam aten du yang galaw lu galaw sha hkawmsa hkawmwa grai yakhkak nga ai majaw, mahkrai hpe gaw gap wa ai re lam chye lu ai.
Ndai mahkrai hpe laiwa sai May shata 20 ya shani kaw nna, Shwigu Ginwang komiti kawn lit la gaw gap wa ai hta June shata 26 ya shani shangut la lu sai re majaw, wunli la akyu hpyi hpawng hpe Magam Dap Makan Dap hkan na magam gun ni hte mungshawa ni sa du shanglawm ai hte galaw la lu sai lam chye lu ai.
