Nam San Yang hpyen man Awng Ja mare makau kaw gasat gala majan matut byin
KIO ginjaw ginra, Nam San Yang hpyen man Awng Ja mare makau kaw September shata 27 ya shana daw hkying 4:00pm aten hta gumshem Myen hpyen dap hte KIA ni gasat gala majan byin ai lam chye lu ai.
Gasat gala majan bying nga ai aten hta Myitkyina maga de na Jet Fighter nbungli 2 hte bawm wa jahkrat da nna, bai nhtang wa mat ai lam, shawng lam na lit nga ai salng ni tsun ai kaw na chye lu ai.
Bumre, Hka Ya Bum kaw nga ai gumshem Myen hpyen ni gasat gala majan byin ai shara hte KIA ni nga na shadu ai shara de laknak kaba hkrup mara gap bun ai majaw, KIA ni mung laknak kaba hte bai nhtang gap bun ai lam nga ai re.
Dai ni September shata 27 ya shani hta sha, Hkatsu mare Sama Ginwang Rung kaw nga ai mungshawa La marai 8 hpe gumshem Myen hpyen dap hte Shwe Min, Pyi Tu Tsit ni Hkatsu Myen hpyen dap de rim woi mat ai lam, ginra masha ni tsun ai kaw na chye lu ai.
Dai rim woi hkrum ai hta Nam San Yang mare na hpyen yen mungmasha marai 2 lawm ai rai nna, Myitkyina maga na nta tsi chya ai marai 3 hte ngam ai marai 3 gaw ginwang rung sin ai jinghku jing-yu ni re lam chye lu ai.
Hpa majaw ndai zawn rim woi mat ai mabyin hte seng nna, chye lu na matu lit nga ai hpung kanu kawa ni hte mare salang ni san sagawn tsun jahkrup nga ai lam, lit nga ai salang ni kaw na chye lu ai.
Ndai rim woi mat ai ni hpe hpung woi kanu kawa ni hte mare komiti salang ni Hkatsu hpyen dap de sa nna, bai sa tsun shaw la lu sai lam, ginra masha ni kaw na chye lu ai.
