Nam San Yang mare makau kaw gumshem Myen hpyen ni hte KIA ni gasat laga majan byin
Ginjaw ginra makau rai nga ai, KIA Masat (5) Dap Ba, Masat (18) Dap Dung ginra, Nam San Yang mare makau kaw July shata praw 3 ya jahpawt hkying 5:00am aten daram kaw nna, gumshen Myen hpyen hpung ni hte KIA hpyen hpung ni gasat gala majan byin ai lam chye lu ai.
Gumshem Myen hpyen n-gun 100 jan daram hpung ni gaw, KIA ni shara la nga ai Nam San Yang maga de, shamu shamawt htu shang wa ai majaw, KIA ni hkap shingla gasat ai kaw nna, gasat poi byin ai re lam, shawng lam shi sawk ni kaw na chye lu ai.
Gasat poi byin ai maga de, Hka Ya Bum kaw shara la nga ai gumshem Myen hpyen ni mung, laknak kaba hte matut manoi gap bun nga ai lam na chye lu ai.
Ndai zawn gasat gala majan byin ai majaw, ya aten Nam San Yang mare masha ni gaw, nawku jawng wang hkan hte tinang shimlum dum ai shara de, hprawng koi yen nga ai lam, mare masha ni tsun ai kaw na chye lu ai.
Lai wa sai June shata 16 ya shani hta mung, gumshem Myen hpyen ni KIA ni shara la nga ai, Nam San Yang maga de, shamu shamawt chyinglau shang wa ai majaw, KIA ni hkap shingla gasat dat ai lam mung byin lai sai re.
