Nam Ya kaw du nga ai gumshem Myen hpyen hpung ni, mungshawa marai (100) daram hpe rim woi mat
Hpakant lam Nam Ya kaw du nga ai gumshem Myen hpyen hpung ni, August shata 24 ya shana hta mungshawa marai (100) daram hpe ninggang shatai na matu rim woi da ai lam, ginra masha ni kaw na chye lu ai.
Ndai gumshem Myen hpyen ni gaw, Hpakant maga de lung wa na matu Nam Ya mare kaw hpyen koi yen du nga ai mungmasha ni hte lai wa lai mungmasha ni yawng marai (100) daram hpe rim woi da ai raitim, shanhte ra ai hpe sha lata woi mat ai, marai kade re hpe tup hkrak gaw nchye lu shi ai lam, buga masha langai tsun dan ai.
August shata 25 ya jahpawt hkying 4:00am aten daram hta Nam Ya kaw nga ai gumshem Myen hpyen ni, Seng Hpra maga de sinat kaba 2 lang gap shadam dat ai hpang, hkying 5:00am aten kaw na Nam Ya hpyen dap na pru wa sai lam chye lu ai.
August shata 22 ya shani hta mung ndai gumshem Myen hpyen ni sinat kaba hkrup mara gap shadam ai majaw, Nam Ya mare kaw pala si langai wa hkrat kapaw ai majaw, mungmasha hpawmi langai pai magyi kaw pala hkyep hkra hkala ai lam byin sai re.
Ndai gumshem Myen hpyen hpung ni gaw, August shata 22 ya shani hta Kamaing Byuha Dap kaw nna, Hpakant lam de shamu shamawt lung wa ai hpyen hpung ni rai nna, dai shaloi mung, mare masha ni hpe ninggang shatai rim woi ai lam galaw ai, ndai Myen hpyen hpung ni hpe Ma U Pin mare makau kaw KIA ni hkap gap gasat ai hpe mung chye lu ai.
Hpakant maga na yu wa ai lai wa lai sa mungshawa ni gaw, hpang lam de bai nhtang wa mung nmai shawng de sa mung nmai rai nna, Nam Ya kaw chyat rawng nga ai lam, ginra masha ni kaw na chye lu ai.
