Nam Ya mare grup yin kaw gasat gala majan byin nga
KIA Masat (9) Dap Ba, Hpakant ginra Nam Ya mare grup yin kaw gasat gala majan byin nga ai lam chye lu ai.
May shata praw 1 ya jahpawt hkying 8:30am aten daram kawn Nam Ya mare lawu, Um Kahtawng shagyit kawng kaw KIA hte gumshem Myen hpyen dap ni gasat gala majan byin nga ai lam, lit nga ai salang ni kaw na chye lu ai.
Ndai gumshem Myen hpyen dap ni gaw, Kamaing de na hpyen n-gun htu shadut lung wa ai rai nna, KIA pawng hpawm hpyen hpung ni hkap shingla gap gasat ai kawn, gasat gala majan byin wa ai re lam chye lu ai.
KIA Masat (2) Dap Ba ginra hta mung, May shata praw 1 ya jahpawt hkying 5:00am aten daram kawn, Lawa mare kyu hpyi bum kaw shara la nga ai, gumshem Myen hpyen dap pawng hpawm hpyen hpung ni hpe KIA pawng hpawm hpyen hpung ni laja lana htim gasat nga ai hta ya aten du hkra, hpyen masa shaja hkat nga ai lam chye lu ai.
Matut nna Manmaw ginra hta KIA pawng hpawm hpyen hpung ni hte gumshem Myen hpyen dap ni gasat gala majan byin ai shata 5 du wa sai raitim, ya aten du hkra gasat gala majan laja lana matut byin nga ai re.
