Nam Ya P.T.Ts ni rim tawn da ai kawn Shayi sha langai hprawng lawt wa

Nam Ya P.T.Ts ni rim woi mat wa ai Kap Maw Zup mare na Shayi sha langai September, 22 ya shana hkying 8:00pm aten hta shi dum nta nga ai Kap Maw Zup de hprawng lawt wa sai lam na chye lu ai.

Dai Num sha hprawng pru wa ai aten hta marang grai htu ai rai nhtawm shi hpe sin ai ni mung shanhte a shara de wa gan hkring nga ai ten hprawng lawt wa ai re lam na chye lu ai. Dai Shayi sha gaw lai wa sai September, 17 ya shana

maga hkying 5:30pm aten Kap Maw Zup mare makau na Hka Nawng hta Tau Kawk sa hkam nga ai shaloi P.T.Ts hpyen hpung n-gun ( 25 ) daram kaw nna sa rim woi mat wa ai re lam chye lu ai.

Dai Shayi sha hpe P.T.Ts hpyen hpung ni woi mat nhtawm, myi pat kau ya nna KIA magam gun ni a nta hpe madun yang dat na, gumhpraw mung jaw na ngu tsun ai hpe Ngai nchye ai ngu nna htai ai majaw sinat hte man kaw lahkawng lang kayet ya ai lam, P.T.Ts hpyen dap hta shi hte rau jep hkrum ai manang lahkawng mung naw nga ai, myi man atsawm nmu lu ai majaw gara mare kaw na re hpe gaw hkrak nchye lu ai nga nna lawt pru wa ai Num sha tsun ai kawn chye lu ai.

Lai wa sai September, 11 ya jahpawt e mung Kap Maw Zup mare kaw na Nam Ya de gat sa ai Shd. Sinwa Naw, Shd. Gun Tu Ring hte Shd. Gum Ring Awng ni hpe P.T.Ts ni sinat hte madi jahkrit woi mat nhtawm KIA re i, nre i ngu san jep nna mungchying masat san la nhtawm bai dat ya ai lam na chye lu ai.