Nambyu Myen dap hpe KIA ni padang dip la

KIA Masat (2) Dap Ba, Masat (14) Dap Dung ginra, Hugawng Ginwang Nambyu mare hta dap jung nga ai, gumshem Myen hpyen dap hpe KIA ni padang dip la lu sai lam chye lu ai.

May shata 16 ya jahpawt hkying 7:30am aten daram hta Nambyu mare kaw dap jung nga ai, gumshem Myen hpyen Hk.L.Y (297, 260) dap hpe KIA pawng hpawm hpyen hpung ni padang dip la lu sai lam, lit nga ai salang ni kaw na chye lu ai.

Nambyu gumshem Myen hpyen dap hpe KIA pawng hpawm hpyen hpung ni lai wa sai May 11 ya shani kaw na htim gasat hpang wa ai gaw dai ni May 16 ya shani padang dip la lu sai re.

Gasat gala majan byin nga yang gumshem Myen hpyen dap ni nbungli hte wa gap garum ai lam ni nga ai raitim, padang dip la lu sai re lam chye lu ai.