Namhkam Banglung hpyen yen ni tinang mare buga de bai nhtang wa na lam hte seng nna bawngban hpawng galaw
Mungmau Ginwang, Namhkam Banglung hpyen yen camp hte Namhkam Jaw 2 hpyen yen camp ni tinang mare buga de bai nhtang wa na lam hte seng nna, November shata praw 3 ya shani camp kata hkrumzup bawngban hpawng galaw ai lam na chye lu ai.
Hpyen yen mungshawa ni nan mare buga de bai nhtang wa na matu hkyen lajang wa ai majaw, UN kaw na garum ningtum nlu ai raitim, KBC Ginjaw hte Ginwang, buga hpung ni kaw nna woi awn galaw ai re lam chye lu ai.
Bawngban hpawng hta hpyen yen ni mare buga de bai nhtang wa ai lam hta, KBC Ginjaw hte Ginwang kaw nna mai byin ai daram ja gumhpraw garum madi shadaw sa wa na lam hte buga hpung, mare salang ni kaw nna mung, dum nta nlu ai ni hpe nta jawm gap ya na lam ni hpe bawngban jahkrup la lu sai re. Hpyen yen ni tinang mare buga de bai nhtang wa nna, tinang buga ginra hta galaw lu galaw sha let rawt jat galu kaba wa na hpe ra sharawng ai lam, Mungmau Ginwang Amu Madu Rev. Lahpai Zau Ra tsun ai.
“Ya wa na kahtawng 5 gaw Myen Hpyen Dap ma dai maga de nnga ai, kaga hpyen ma nnga ai, Mungmyit Sinli Ga raitim hpa hpyen ma pru pru shang shang nnga ai re majaw, shim ai shara re ngu mu lu ai le, dai majaw hpung masha ni wa nna galaw lu galaw sha rai galu kaba wa na hpe ra sharawng ai. Dai hte maren sha mai wa ai kaga ginra hkan na hpyen yen ni mung wa nna, tinang lamu ga bai madu, galaw lu galaw sha rai nna galu kaba sa wa yang grau manu ai” nga nna tsun dan ai.
Mare buga de bai nhtang wa na lam hpe pang 2 hku ra lata nhtawm, nambat langai ang ai ni gaw February shata hta wa na rai nna, nambat 2 ang ai ni gaw April shata de wa na matu hkyen lajang da ai lam na chye lu ai.
Hpyen yen ni dum nta wa na lam hte seng nna buga hpung kaw nna Myen Asuya hte Shanglawt Asuya lahkawng maga jahkrup da sai lam, Namhkam Banglung hpyen yen ni gaw laiwa sai 2011ning, 2013 ning majan byin hpang wa ai aten kaw nna hpyen koi yen nga ai rai nna, ya aten Namhkam Banglung camp hte Namhkam Jaw 2 camp hta mare kahtawng 5-6 kaw na hpyen yen htingaw 205 shanu shingbyi nga ai lam chye lu ai.
Photo Credit; Mungmau Nsen
