Namhpalun modo lam kaw gumshem Myen hpyen ni hte KIA ni gasat gala majan byin
Mungmyit Sinli Ga (Kachin Sub-state), KIA Masat 6 Dap Ba, Masat 9 Dap Dung ginra, Namhpalun modo lam kaw June shata 14 ya jahpawt hkying 5:04am aten kawn hkying 5:53am aten du hkra, gumshem Myen hpyen ni hte KIA ni gasat gala majan byin ai lam chye lu ai.
“Myen hpyen dap masat kade re tup hkrak gaw n chye shi ai, ndai lapran hta Munggu de na Dapnu (Tatma-77) ni galai yu wa ai gaw rai nga ai. Hpyen n gun gaw 150 daram re” nga nna shawng lam na lit nga ai salang langai tsun ai.
Gumshem Myen hpyen dap ni, KIA hpyen hpung ni nga ai shara de shamu shamawt shang wa ai majaw, KIA ni hkap shingla gasat dat ai kaw na gasat poi byin ai re lam chye lu ai.
June shata praw 1 ya shani hta mung, KIA Masat 6 Dap Ba, Masat 36 Dap Dung ginra, Namhkawng Bum mayan kaw gumshem Myen hpyen hpung ni hta KIA hpyen hpung ni gasat gala majan byin ai re hpe mung chye lu ai.
