Namsan Yang mare hta Hkristmas hte Wunli la akyu hpyi hpwng galaw
Laiwa sai 2011 ning June shata kaw nna Myen hpyen dap hte KIA hpyen dap ni numdaw mi majan bai byin wa nna yen shakram da ai Namsan Yang mare hta December 23 ya jahpawt hkying 9:30am aten kawn shana maga hkying 2:00pm aten du hkra, RCM nawku jawng wang kaw Hkristmas hte Wunli la akyu hpyi hpawng galaw ai lam chye lu ai.
Ndai hpawng hpe galaw lu na matu, ႒ာနဆိုင္ရာ de ahkang hpyi ai shaloi shanhte mung ahkang jaw ai hte maren daining gaw nawku jawng wang kaw Hkristmas hte Wunli la akyu hpyi hpawng hpe galaw lu sai. Maning moining gaw Home Hkristmas hku nna, nta kaw sha galaw ga ai, nga nna poi lamang hpe woi awn ai Jan Sumlut Pri Htam tsun ai.
Yaw shada ai lam gaw, majan a majaw Myitkyina, Laiza, maga hpyen yen mat wa nna shaning 6, 7 ning nkrum hkat mat ai ni yawng bai hkrum zup lu na matu hte Mungdan lawan simsa nna mare buga hta dai ning kabu lu ai zawn htining hpraning galoi mung wuwu didi lu wa nga na matu yaw shada let galaw ai re lam, Jan Sumlut Pri Htam matut tsun ai.
Dai ni galaw ai Hkristmas hte Wunli la akyu hpyi hpawng hta du sa ai masha yawng marai ( 600 ) daram rai nna, Wa Jau marai ( 4 ) hte hpung masha ni, KBC nawku hpung masha ni, AG nawku hpung masha ni hte Namsan Yang mare kaw nga lai wa ai hpunau Myen, Sam nkau mi mung wa du shanglawm ai lam chye lu ai.
