Namti Lambraw Yang kaw hpyen yen nga ai Kasung hte Zupmai mare na mungshawa ni tinang a buga de bai nhtang wa
Namti Lambraw Yang kaw hpyen koi yen nga ai Kasung hte Zupmai mare na mungshawa ni gaw, August 22 ya shani ka-ang hkying 12:00non aten hta akyu hpyi la nna, modo 200 daram hte tinang a buga de bai wa sai lam chye lu ai.
Ndai hpyen yen mungshawa ni ya na zawn wa lu ai lam gaw, PCG hte nawku hpung na salang ni, hpyen yen mungshawa ni hpe shawng jahkrup bawngban ai shaloi, mungshawa ni gaw tinang a dum nta de bai nhtang wa mayu ai nga nsen le wa ai majaw, asuya hpe bai jahkrup ya ai hta, asuya a ahkang hte ya na zawn buga de bai wa lu ai re lam, wa sa ai kaw, asuya salang ni, PCG, nawku hpung, sut du ni hte UN kaw na ni sa sa ai lam, hpyen yen hpe lakawn ai salang langai tsun dan ai kawn chye lu ai.
Kasung hte Zupmai mare na mungshawa ni gaw, Myen hpyen dap hte KIA Dap Dung ( 11 ) ni gasat majan byin ai hta Myen hpyen dap ni mare de sinat kaba gap bun wa ai majaw, August 11 ya shani Namti Lambraw Yang de hpyen koi yen wa ai ni rai nga ai.
