Namwk ginra gasat gala majan matut byin nga
KIA Masat (3) Dap Ba, Nmawk ginra hta KIA hte gumshem Myen hpyen dap ni gasat gala majan matut byin nga ai lam chye lu ai.
September shata 23 ya shani hta mung, Nmawk ginra de hpyen n-gun htu shadut nga ai gumshem Myen hpyen dap hte KIA pawng hpawm hpyen hpung ni kalang bai gasat gala majan matut byin nga ai lam, lit nga ai salang ni kaw na chye lu ai.
Gumshem Myen hpyen dap ni gaw, Deng (7) makau grup yin de nbungli bawm (7) lang, Drone bawm, Tank mawdaw ni hte gap gasat ai lam galaw nna, lagaw lam hte mung htu shadut lung wa ai majaw, KIA hte laja lana gasat gala majan bai matut byin nga ai lam chye lu ai.
Nmawk gumshem Myen hpyen dap hpe KIA ni htim gasat zing la lu ai hpang, gumshem Myen hpyen dap gaw Manmaw, Nmawk ginra de hpyen n-gun matut htu lung wa nga ai majaw, shani shagu ngu na gasat gala majan matut byin nga ai re.
