Nanghpam hpe ninghkap ai ramma gawdin shingjawng lamang galaw
Laiza Muklum, Zup Awng Gawdin Ginsup Pa hta June shata 24 ya shana de Laiza buga pat jasan hpung ni woi awn nna, nanghpam hpe ninghkap ai ramma gawdin ninggang ginsup shingjawng poi lamang galaw la lu sai lam chye lu ai.
Ndai ginsup poi lamang hpe lai wa sai June shata 17 ya shana de kawn ginsup hpang ai rai nna kyuhpyi lawk 1, kyuhpyi lawk 2, kyuhpyi lawk 3, kyuhpyi lawk 4, kyuhpyi lawk 5 hte Mung Seng Yang, Ja Htu Kawng pawng hpawm nna group 6 garan nhtawm ginsup ai re.
Ninggang hpe Mung Seng Yang, Ja Htu Kawng ni lu mat ai rai nna Nambat 2 hpe Kyuhpyi lawk 4 ni lu mat ai. Nambat 3 hpe gaw Kyuhpyi lawk 5 ni lu mat ai re hpe chye lu ai.
Nanghpam hpe koi gam, zet let ai ramma a shawng lam, ngu ai gabaw kata hta yaw shada lam masum nga ai. ( 1 ) Ramma ni tinang hkum tinang manu shadan chye wa lu na matu ( 2 ) Ramma ni shada kanawn mazum lam hta myit hkrum kahkyin lu wa na matu ( 3 ) Nanghpam hpe koi yen ninghkap ai ramma ni byin tai wa lu na matu, yaw shada ai re lam Laiza Buga Hkalup Hpung na Rev.Chyinyu Zau Ring tsun ai.
Nanghpam hpe ninghkap ai ginsup lamang hpe daining gaw shawng ningnang lang galaw ai rai nna, ndai gawdin ginsup lamang hpe shaning shagu galaw sa wa na re lam chye lu ai.
