Namhpalun Bum hte Hpahkip mare lapran kaw KIA hte gumshem Myen hpyen ni gasat gala majan byin
Mungmyit Sinli Ga (Kachin Sub-state) KIA Masat (6) Dap Ba, Masat (9) Dap Dung ginra, Namhpalun Bum hte Hpahkip mare lapran na buhkrawp sun kaw July shata 28 ya shani hta gumshem Myen hpyen n gun 100 daram hpung ni gaw, KIA ni nga ai shara de shamu shamawt lung wa ai majaw gasat gala majan byin ai lam nga ai.
“Aten gaw shani ka-ang hkying 12:20pm kaw nna hkying 1:00pm aten du hkra rai nga ai, shanhte hkrai bai gap ai gaw hkying 1:40pm aten du hkra re. gasat poi byin ai shara de, Kutkai, Namhkai hte Namhpakka kaw dap jung ai Myen hpyen dap ni kaw nna sinat kaba hte gap bun ma ai” nga nna shawnglam na lit nga ai salang langai tsun dan ai.
Dai na de hkying 6:00pm aten daram hta Malun Bum maga na du yu wa ai, gumshem Myen hpyen hpung ni gaw, Nam Um mare kaw wa du nna, mungmasha ni a nta hkan sawk jep hkawm nhtawm, mara kata Miwa amyusha mying nchye lu shi ai la langai hpe Myen hpyen ni gyit adup da ai, hpa majaw gyit adup ai lam gaw atsawm n chye shi ai, nga nna salang wa tsun ai.
Kokang MNDAA hpyen hpung ni hte gumshem Myen hpyen dap ni July shata 27 ya shani hta Malun Bum mayan kaw gasat poi byin ai lam nga ai hpe chye lu ai.
