Nati Buga Hkalup Sasana wang lamu ga hpe Sam amyusha Hpungkyi ni kashun kum maden la
Sammung Ginwang, Sinli Ninghtawn, Nati mare Nati Buga Hkalup Sasana wang rai nga ai sasana laili laika sharin jawng hpaw sharin lai wa ai shara hpe Sam amyusha Hpungkyi ni kaw nna sa kashun kum maden la ai lam na chye lu ai.
Ndai lamu ga hpe Nati Buga hpung ni kaw nna shawng ningnan hkyen shatsawm htu shara nna, 1948-49 ning hta Saranum Kaba Labang Roi Ji kaw nna Nati Hkalup Hpung ni a sasana laili laika sharin jawng hpaw sharin lai wa ai shara re lam chye lu ai.
Ndai shara hpe laiwa sai 2013 ning hta Nati nawku hpung a ginra Hall gawgap na matu npawt nhpang nlung jahkrat hpang nga ai ten, Nati Buga mare kaw nga ai Sam amyusha ni gaw, shanhte a shara re nga nna ginra gawgap ai lam n galaw na matu, ninghkap mara tam wa ai majaw, Hall gawgap ai lam hpe gan jahkring da ai shara hta, 2019 ning April shata 18 ya shana aten, Sam Hpungkyi nan woi awn nna shanhte a bukda makam dawnghkawn hpe sa jun masat ai lam galaw nhtawm, 2020 ning January shata 28 ya shani hta Nati buga hpung wang hpe kum da ai wut shadaw ni hpe adup run kau nhtawm, Bukda dawnghkawn jung da ai hpe wut shadaw hpri jung nna bai kum maden la kau ai re lam, Nati Buga Hpung Amu Madu Sara Loi Wawm Brang tsun dan ai.
Ya na zawn nawku hpung sasana wang hpe sa kum maden wa ai hte seng nna, seng ang ai lit nga ai salang ni hpang de, Sam ni sa kashun kum maden da ai shara hpe dawm kau ya na matu, n-gup aga, laika hte lang hte lang tang madun ai raitim, ahkyak la ya ai lam nnga ai re sha n-ga, Sam amyusha ni hku nna shanhte kashun da ai shara hta, Sam ni a makam gawk-ngu hpe gawgap hkyen wa ai re hpe na chye lu ai.
Nati buga hpung masha ni kaw nna ndai buga hpung wang hpe bai lu hkra tara hte hkrak hparan la mayu ai lam, Sara Loi Wawm Brang matut tsun dan ai hta, “Ya ndai lamu ga ni hpe mi nnan kawn hpang wa ai gaw, anhte shara anhte lamu ga re majaw, anhte nan bai ra ai hku re, lu la hkra ngu nna sawn taw ai, hpu nau sam ni gaw anhte hpe shara kachyi sha nga tim kashun hkrai kashun, maga mi de je tam ai lam law wa, hpang daw ndai hku nbyin na matu tara hte hkrak hkrak hparan la mayu ai, hpang daw manghkang nbyin na matu hkyen lajang ra ai lam grai nga wa ai hku rai nga, lu hkra ngu sawn nga ga ai” nga nna tsun dan ai.
Ndai lamu ga manghkang hte seng nna Ninghtawn Uphkang Rung kaw 3 lang san jahkrup ai lam galaw sai rai nna, Ningtawn Salang ni kaw nna ginra sa yu gawan ai lam galaw sai re hpe mung chye lu ai.
Ndai Nati buga hpung sasana wang lamu ga hpe bai lu la hkra hpaji jaw lam tam ya na matu Sammung Ginwang hte Sammung Htunghking de laika bang tang madun da sai lam, Nati mare hta Hkalup Hpung htinggaw 40 daram nga ai rai nna, ndai Nati Buga Hpung Sasana wang hpe sa kashun kum maden la ai Sam ni gaw Jinghpaw Wunpawng amyusha ni hte arau nga wa ai sam amyusha ni n re sha, kaga ginra kaw nna wa nga ai sam amyu ni re hpe na chye lu ai.
Photo Credit; Loi Wawm Brang
