Naw Mung mare kaw na hpung magam gun sara marai (3) rim hkrum
Putao Ginwang, Naw Mung mare kaw na hpung magam gun sara marai (3) hpe Putao Myen Balik Dap ni kaw nna June shata (28) ya shani rim woi mat ai lam, buga masha ni tsun ai kaw na chye lu ai.
Rim hkrum ai hpung magam gun sara ni gaw, Rev. Gushin Sin Sar (KBC), Sara Zar Gawn Hti Na (COC) hte Rev. Manhku Dee (RBC) ni rai nna, ya aten Putao Balik Dap hkyuk kaw sharen da hkrum ai re lam chye lu ai.
Rim hkrum ai sara ni gaw, Mungdan ngwi pyaw simsa lu na matu akyu hpyi ai lawng lam a ntsa ၅၀၅ (က) hte tara jawat da ai majaw rim hkrum ai rai nna, ndai amu hte seng nna July shata 12 ya shani amu jep chyoi sa wa na re lam, ginra masha langai tsun ai.
“Mungdan ngwi pyaw simsa lu na matu lai wa sai March shata praw (3) ya shani galaw ai hkristan nawku hpung shagu na Naw Mung Ramm ni a kanawn mazum akyu hpyi hpawng hta sa du shang lawm ai hpung magam gun sara marai (5) kaw na marai (3) hpe Mungdan ngwi pyaw simsa lu na matu ngu ai ga baw kata akyu hpyi ai lawng lam a ntsa nra sharawng ai ni kaw nna, Putao Ginwang hpyen asuya rung kaw laika mara da ai majaw, shanhte marai (3) hpe shaga la ai lam rai nga ai” nga nna tsun dan ai.
Naw Mung hpung magam gun marai (3) tara jawat hkrum ai gaw n tara ai re lam, rim hkrum ai kaw na Rev. Gushin Sin Sar hte Rev. Manhku Dee gaw hkamja lam loi sadi ra ai lam, ginra masha ni tsun ai kaw na matut chye lu ai.
