Nawmung ginra kaw Internet line galaw ya na matu online hku nna photo campaign galaw

Putao Ginwang, Nawmung ginra kaw Internet line galaw ya na matu, Nawmung ramma ni kaw nna, December shata 8 ya shani Mungdan Asuya hpang de hpyi shawn ai hku nna photo campaign hpe online hku galaw ai re lam na chye lu ai.

Nawmung ginra kaw Internet line nlu ai majaw, ramma ni a prat shawng lam, hpaji lam hta grai sum machyi nga ai re. Sut masa lam, shinggyim masa lam hta mung, yak hkak dut dang ai lam ni a majaw lamang hpe galaw ai re lam, photo campaign kaw lawm ai Sara Yungngai Dawi tsun dan ai.

Photo, Interview, video file ni hte online campaign galaw ai hta, “Hpaji sharin lu na matu Internet line jaw rit, Nawmung ginra mung Mungkan kaw lawm ai, Phone line nlu, Internet line nlu ai ginra hpe matsan dum ya rit, Internet lu na matu Asuya kaw lit nga ai” ngu ai ga si ga ngau ni hte online campaign galaw ai re lam chye lu ai.

Nawmung ginra kaw shanu nga ai Jinghpaw Wunpawng amyusha ni gaw, bum maling kata hkan na tsi mawan ni hpe tam le,t dut lu dut sha ai kanbau bungli hpe madung galaw nga ai rai nna, Internet line nlu ai majaw, ramma ni a hpaji lam hta sum machyi ai lam nbyin na matu, Internet line lawan galaw ya na hpe ra sharawng nga ai lam, Nawmung ramma ni tsun lajin da ai kaw na chye lu ai.

Photo Credit; Fb