Nawng E Hku Buga hpung gaw de ai 25 ning hpring gumhpraw Jubilee chyeju shakawn hpawng galaw na
Sama Ginwang, Nawng E Hku Buga Hkalup Hpung gaw de ai 25 ning hpring gumhpraw Jubilee chyeju shakawn hpawng lamang hpe Laiza lawk 1, Nawng E Hku Buga Hkalup hpung nawku jawng wang kaw March shata 19 ya hte 20 ya shani galaw na re lam chye lu ai.
Poi lamang hta Nawng E Hku buga hpung masha ni a mara raw akyu hpyi ai hpawng lamang, Jubilee masat shadaw hpaw akyu hpyi hpawng hte Buga gaw de ai 25 ning hpring Jubilee chyeju shakawn hpawng galaw na re lam chye lu ai.
March shata 19 ya shana daw hkying 4:30pm aten hta Htunghking magun lit hpe akyu hpyi hkap la ai lam galaw na rai nna, March shata 20 ya shana maga hta gaw 30 lang na Sama Ginwang Hkalup Hpung Ginjaw dawdan komiti hpawng hpaw lamang hte ka hkrang lamang ni lawm ai re hpe chye lu ai.
Nawng E Hku Buga Hkalup Hpung gaw de ai 25 ning hpring gumhpraw Jubilee chyeju shakawn hpawng lamang hta Nawng E Hku buga hpung kaw nga lai wa yu sai Nu wa ji nban hte hpung masha ni yawng sa du chyeju shakawn lawm na matu myit mada ai lam, poi shabyin shatai komiti ni saw shaga ai kaw na chye lu ai.
