Nawng Nang (KTCS) kaw nna (2020-2021) jawnglung ladaw hte seng ai ndau laika shapraw
Jinghpaw Wunpawng Chyum Dakkasu (KTCS) kaw nna (2020-2021) jawnglung ladaw hpe November shata praw 1 ya shani kawn bai hpang sa wa lu na matu, mying jahpan hkap la nga sai lam ndau laika shapraw da ai re.
M.Div, B.Th hte L.Th jahtum shaning jawngma ni gaw second semester hpe Online distance learning hku nna November shata praw 1 ya shani hta sharin hpang sa wa na re hte jawng mying bang / jawng shabrai bang ai lam hpe October 27 ya shani hta hpang jahtum bang ra na re.
BATS music I, II, III, IV, DCA the BATS I, II, III, IV classes lung na jawngma ni gaw December shata 14 ya shani hta jawng lung hpang sa wa na re majaw jawng mying bang ai lam hpe December shata praw 7 ya shani hta hpang jahtum galaw ra na re.
B.Min program hpe first semester lung na jawngma ni gaw November shata 23 ya shani hta hpang sa wa na rai nna, November 16 ya shani hta jawng mying bang ai lam hpe hpang jahtum galaw ra na.
M.Min program jawngma ni gaw first semester hpe November shata 30 ya shani kaw nna jawng lung hpang na re hte November 23 ya shani hta gaw hpang jahtum jawng mying bang ra na re lam ndau laika hta tang madun da ai.
MACS program second semester hpe gaw September shata 12 ya shani kaw nna jawng lung hpang taw sai re hte seng ang ai program shagu na jawngma ni mung, hkrat ang ai jawng shabrai ni hpe Aya bank kaw bank account No.0030202010287033 (Bank Account Name KTCS +5) hta sa bang ra na lam ndau laika hta tsun da ai re.
Jawng shabrai hpe gaw, M.Div, B.Th hte L.Th jahtum shaning jawngma ni (240000 Kyats), BATS music I, II, III, IV, DCA the BATS I, II, III, IV classes lung na jawngma ni semester langai a jawng shabrai (230000 Kyats), M.Min program jawngma ni (200000 Kyats), B.Min program jawngma ni (190000 Kyats) hte MACS jawngma ni gaw semester langai a jawng shabrai (200000 Kyats) hpe hkrak tup bang sa ra na lam tang madun da ai.
Ndau laika hta, masat da ai aten hta jawng mying nbang ai ni hpe dai ning na jawng lung shaning hta nhkap la na, jawng shabrai bang sai receipt hpe registra rai nga ai Sara lahtaw Zau Ja ( Ph, 09-971200232 / email address: KTCS Registrar) hpang de receipt shalai madun nna jawng mying bang ai lam hpe galaw sa wa ra na lam Matsing hpe mung tang madun da ai.
COVID-19 aten ladaw re majaw jawng laika ni hpe online hku nna sharin ginlen ya ai shaloi shawoi na daram tang du ai lam nnga ai nga nna Sara Lahtaw Zaw ja ya na zawn tsun dan ai.
“Online hku nna classroom kaw sharin ai hta gaw tang ndu ai hku re. Jawng ma ni mung online kaw na re nga jang gaw myit loi nlawm ai hku re. Dai hta gaw line nhkrak ai lam ni, nkau jawng ma ni computer nlu ai majaw phone hte bai hkaja ai shaloi, shawoi na daram tang du ai lam nnga mat wa ai.”
Jinghpaw Wunpawng Chyum Dakkasu (KTCS) hta gaw shaning shagu jawngma law law hpe sharin ya nga ai raitim 2020-2021 jawng lung ladaw shaning hta gaw COVID-19 kap bra ana zinli a majaw jawng kaw nlu sharin ai majaw online ntsa kawn sharin hkaja ginlen ya nga ai lam chye lu ai.
