Nbung laru kaba a majaw hpyen yen mungshawa ni a nta ni hten mat

Sinpraw Ginwang Ginjaw kata rai nga ai Pa Kahtawng hpyen yen dabang hta February shata 16 ya shana yuptung hkying 12:00am aten daram kaw nna jahpawt hkying 3:00am aten du hkra nbung laru kaba bung du wa ai majaw nta htinggaw 100 jan hten run lawm mat ai lam chye lu ai.

“Daini gaw Wunpawng Ninghtoi ( WPN ) hte KIO hpyen yen lakawn lanawn ni pawng hpawm nna gram lajang ai lam ni galaw nga ai” nga nna Pa Kahtawng hpyen yen dabang na Amu Madu Salang Kaba Waje Doi San Awng tsun dan ai.

Nbung laru a majaw Pa Kahtawng hpyen yen, Nhkawng Pa hpyen yen hte loije hpyen yen hkan na dum nta  100 jan hten run mat ai lam chye lu ai.

February shata 17 ya shana daw hkying 4:00pm jan aten hta mung Mogaung, Mayan hte Loi Hkaw mare ni hta sin marang kaba htu hkrat ai majaw dum nta hpri hpraw ni waw mat ai lam buga masha ni kawn chye lu ai.