Nbungli bawm a majaw, mungshawa langai asak si sum

Myitkyina Ginwang, Namti Yang Ninghtawn, Kasung mare kaw gumshem Myen hpyen dap ni nbungli bawm wa jahkrat bun ai majaw, mungshawa langai asak si sum mat ai lam chye lu ai.

September shata 18 ya jahpawt hkying 10:30am aten daram hta gumshem Myen hpyen dap ni Jet nbungli hte Kasung mare kaw bawm (2) lang wa jahkrat bun ai majaw, mungshawa langai asak si sum nna dum nta ni mung hten za mat ai lam, ginra mungshawa ni kaw na chye lu ai.

Asak si sum mat ai mungshawa gaw, Namti Lambraw Yang na Shayi. Roi Ja asak (20) ning rai nna, nbungli bawm wa hkrat kapaw ai shaloi hkala sawng ai majaw, Myitkyina tsi rung de htaw sa wa ai lam kaw nnga mat ai re lam chye lu ai.

Gasat gala majan byin ai lam nnga ai kaw ya na zawn gumshem Myen hpyen dap ni nbungli hte wa gap gasat ai lam gaw, mungshawa ni hpe gap masat tawn let dasang wa gap gasat ai rai nna, Hpakant ginre de mung gumshem Myen hpyen dap ni nbungli, laknak kaba ni hte hkrup mara gap gasat nga ai majaw, mungshawa si hkala hkrum nga ai hte dum nta law law hten za hkrum nga ai lam chye lu ai.