Nbungli bawm a majaw mungshawa si hkala hkrum
Oplus_131072
Hpakant ginra gumshem Myen hpyen dap ni nbungli hte wa gap gasat ai majaw, mungshawa si hkala hkrum ai lam chye lu ai.
November shata 11 ya shani hkying 1:30pm aten daram hta Myitkyina kaw na rawt lung wa ai Y-12 nbungli hte Hpakant Lawng Hkang mare kaw bawm wa jahkrat bun ai majaw, mungshawa hpaw mi langai asak si sum mat nna, laning mi jan re shi kasha mung hkala hkrum ai lam, ginra masha ni kaw na chye lu ai.
Bawm wa jahkrat bun ai shara hta gasat gala majan byin ai lam nnga ai kaw gumshem Myen hpyen dap ni bawm 30 jan lang daram wa jahkrat bun ai majaw, mungshawa si hkala hkrum ai rai nna dum nta ni mung hten za hkrum ai re lam chye lu ai.
Hpakant ginra hta gumshem Myen hpyen dap ni nbungli, drone, laknak kaba ni hte hkrup mara gap gasat ai lam ding yang ngu na galaw nga ai majaw, mungshawa si hkala hkrum nga ai hte dum nta law law mung htenza hkrum nga ai lam chye lu ai.
