Nbungli bawm a majaw mungshawa si hkala hkrum
KIA Masat 8 Dap Ba ginra kata gumshem Myen hpyen dap ni, nbungli bawm wa jahkrat bun ai majaw, mungshawa si hkala hkrum ai lam chye lu ai.
February shata 18 ya shana hkying 8:20pm aten daram hta Tada Oo kawn rawt lung wa ai gumshem Myen hpyen dap Jet nbungli, Gau Gwi Hka, Nyen Zup kaw bawm wa jahkrat bun ai majaw, mung shawa marai (2) asak si sum mat nna marai (5) hkala hkrum ai lam, ginra masha ni kaw na chye lu ai.
Jet nbungli (2) hte Gau Gwi Hka, Nyen Zup kaw bawm 8 lang wa jahkrat bun ai re, bawm wa jahkrat bun ai hta mungshawa marai (2) asak si sum mat nna, marai (5) hkala hkrum ai hte dum nta ni mung hten za hkrum mat ai re lam, ginra masha ni kaw na matut chye lu ai.
Gumshem Myen hpyen dap ni gaw ya aten, Myen mung kata gasat gala majan byin ai lam nnga ai shara hkan raitim, nbungli, drone, laknak kaba ni hte hkrup mara gap gasat ai lam ding yang galaw nga ai majaw, mungshawa si hkala hkrum nga ai hte dum nta ni mung hten za hkrum nga ai re lam chye lu ai.
