PRAT HPE ASUM N’JAW AI N’CHYANG HTU SENG HTE SAN HTAI
San : Kanau hte ga san ga htai galaw mayu ai le, mai na kun?
Htai. Mai ai le.
San : Kanau gaw kadai kasha rai? Mying kaning nga ai kun?
Htai: Amyu gaw Marip re, Htinggaw mying gaw N-Chyang ni nga ma ai, Mying gaw Nchyang Htu
Seng nga ma ai.
San : Nu yan Wa gaw I naw nga ai rai? Mying gaw kaning nga ma ni?
Htai : Nu na mying gaw Hkyet Pri, Wa na mying gaw Nchyang La nga ma ai. Anu gaw Maung
Cancer ana hte si mat sai. Awa mung machyi na si mat sai.
San : Nta buga gaw gara kaw na kun?
Htai : Hkaya mare na re.
San : Nan nau ni marai kade wa rai? Yawng naw nga ai i?
Htai : An nau ni marai 6 re, marai masum si mat sai.
San : Kanau na asak gaw kade ning re sai kun?
Htai : 17 ning rai sai.
San : Kanau a lagaw hpa baw byin mat ai, hkri tung kaw na byin ai kun?
Htai : Hkri tung kaw na byin ai n re, ngai laning mi jan sha naw re ten hta,Nu yan Wa gaw Hkaya mare de wa nga n’htawm, Yi sun wa woi galaw sha ma ai kaw, Nu yan Wa gaw nam de si mai tam sa mat ai.Annau ni masum hpe tawn da ma ai. Hpu Doi yen a ji gaw ngai hpe yi wa kata kaw shayup da na, shan lahkawng gaw namlap ye sumhpun la nna, wan nat dat ma ai.Shaloi yi wa de wan chyi kap wa jang, hpu doi gaw hprawng mat nna, A Ji gaw yi wa n’pu de kanaw shang mat ai.Yi wa krau da grai nem nna, grup grup mung kum da ai majaw wan gaw chyi si wa rai, ngai gaw yi wa kata kaw she n hkrap taw sadawng, shaloi anhte a htingbu ni kagat sa nna ngai hpe sa pawn shaw la ma ai da.
A Ji hpe gaw n lu shaw la ai majaw dai kaw hkru si mat sai. Nu yan Wa gaw wan ni pyi ganoi si htum ai shaloi she nam de na du wa ma ai da. Shaloi ngai mung wan hte galip kapawng da sai majaw, Laiza mung shawa tsirung de wa woi tsi ma ai. Shata mi ram tsi tim n mai hkraw ai majaw, n’ta de yu wa n na bum tsi bai wa galaw tsi la ai re da.
San : Kanau gaw laika hpaji tsang gade du hkra sharin la lu ai kun?
Htai : Myen jawng tsang langai sha lu lung la ai. Dai hpang a nu mung laja lana rai machyi taw ai
majaw anu hpe bai sin ra hpu ba mung gumhpraw tam hkawm mat ai. A nu hpe sin ra ai
majaw jawng mung n’lu matut lung mat sai.
San : Kanau gaw kaga bungli shaja zawn re ni I lu galaw ai kun?
Htai : Kaga bungli shaja gaw n lu galaw ai. Shat Si mai shadu buhpun palawng hkrut zawn re ai ni
gaw lu galaw ai.
San : Kanau hkam sha ai hpe mung tsun dan rit le.
Htai : Lagaw n kaja ai majaw manang ni du ai shara de n lu du ai. Hpaji laika law law n lu sharin la
ai.
San : Kanau byin mayu ai lam ni hpe tsun dan rit.
Htai : Zar Htu chye htu mayu ai, Nampan mawm sumli hpaji hpe chye mayu ai.
San : Ya na zawn Ga san ni hpe htai ya ai majaw grai chyeju kaba sai yaw.
