Ndau laika shabra da ai hta hkansa shatup ai lam nga nnga jep chyoi nga

Laiza muklum uphkang rung kawn, Myen gumhpraw manu nnga mat ai hte seng nna, ndau laika shabra da ai lam hta hkansa shatup ai lam nga nnga, jep chyoi hkawm ai lam hpe August shata 29,30 lahkawng ya Muklum kata galaw nga ai.

Jep chyoi hkawm ai lam hta muklum magam dap shagu na Hkamja Dap, Wan Sat Dap, Balik Dap, Customs, Municipal hte Uphkang Rung ni shang lawm ai lam chye lu ai.

Ya na zawn galaw ai a yaw shada lam hpe Salang Kaba Myitung Chyang Bawm (N/T Uphkang Du) tsun ai hta “Ya ten hta mungchying mungshawa dap shawa nnga yawng ni gaw aten ladaw mi yakhkak jamjau taw nga ai, dai hta Myen gumhpraw manu ndan wa ai, Miwa gumhpraw madang tsaw wa ai, rai yang mari lu mari sha dut lu dut sha lam hta dut dang wa ai, dai re majaw dut lu dut sha nga ai ni hte mari lu mari sha nga ai mungshawa yawng a lapran hta n ging dan ai manu masa hte pri nyem ai hku na myit ngwi myit pyaw hte byin let, manu ni hpe ma ja tsaw nga ai ni hpe tsaw ai ngu shayawm shangun ai, gumhpraw galai ai hte seng nna mung shai hkat ai lam ni hpe atsawm tawt sawn chyena shangun ai lam ni hpe yaw shasa let galaw ai re” nga nna tsun ai.

Kunrai ni hkamja lam hte bung pre ai lam nga nnga, seng laisin ahkaw ahkang hte hkrak hpaw da ai lam nga nnga, seng hkan bungli galaw ai masha ni hte seng nna jep chyoi ai, san seng san pan lam, ahkun hkang se hte seng ai lawng lam ni hpe jep chyoi ai lam ni hpe galaw ai nga nna Salang Kaba matut tsun ai.

Muklum kata hta ndai zawn jep chyoi ai lam hpe seng gawk shagu shang lu na matu wuhpung mali garan let jep chyoi sa wa ai hta (1) Malu masha, lang arung arai hte tsi mawan yu reng tek jum komiti (2) Jak sau dut seng, nta/ seng gawk manu, gawgap kunrai, dut seng, bungli dabang hte hkatum manu, Store, Mini-Market, jak chywi seng tek jum komiti (3) Hotel manam jarawp, lu sha seng, KTV, yu reng tek jum komiti (4) Line Modo htaw wa htaw sa, Modo/Cycle workshop, Modo cycle rungrai dut seng, Eletronic phone seng ni hpe yu reng tek jum komiti nga nna hpaw shabawn let, jep chyoi bungli shang taw ai lam chye lu ai.

Ndau shabra laika hpe August shata 19 ya shani hta shabra da ai lam nga sai, dai laika a ntsa chye na ai lam nga nnga, ta tut hta dut lu dut sha nga ai mungshawa ni hpe hpaji jaw ai, sadi jaw ai, ningmu jahpaw ai lam ni hpe galaw ngut ai hpang, hkansa shatup ai lam n nga ai ni hpe ahkyak la sa wa na re lam chye lu ai.